ສັກຢາກັນພະຍາດວໍ້ສຳລັບສັດລ້ຽງໂດຍບໍ່ເສຍຄ່າໃນວັນທີ 28 ກັນຍານີ້.
ສັກຢາກັນພະຍາດວໍ້ສຳລັບສັດລ້ຽງໂດຍບໍ່ເສຍຄ່າໃນວັນທີ 28 ກັນຍານີ້.
ພະຍາດວໍ້ຖືເປັນອີກພະຍາດໜຶ່ງທີ່ຮ້າຍແຮງຕາມຂໍ້ມູນແລ້ວ, ນັບແຕ່ປີ 2012 – 2020 ສປປ ລາວ ຖືກໝາກັດຈຳນວນ 284 ຄົນ ແລະ ເສຍຊີວິດ 39 ຄົນ, ແຕ່ລະປີໃນທົ່ວໂລກຈະມີຜູ້ເສຍຊີວິດຈາກພິດວໍ້ປະມານ 59 ພັນຄົນ ຜູ້ທີ່ເສຍຊີວິດສ່ວນໃຫຍ່ແມ່ນຜູ້ຄົນທີ່ທຸກຍາກທີ່ອາໄສຢູ່ໃນເຂດຊົນນະບົດ ແລະ ສັດສ່ວນຜູ້ທີ່ເສຍຊີວິດສ່ວນຫຼາຍແມ່ນເດັກອາຍຸຕ່ຳກວ່າ 15 ປີ. ໃນວັນຕ້ານພະຍາດວໍ້ໂລກວັນທີ 28 ກັນຍາທີ່ຈະມາເຖິງນີ້, ກົມລ້ຽງສັດ ແລະ ການປະມົງ ກະຊວງກະສິກຳ ແລະ ປ່າໄມ້ ໄດ້ຖະແຫລງຂ່າວຕໍ່ສື່ມວນຊົນໃນວັນທີ 21 ກັນຍານີ້, ເພື່ອປູກຈິດສຳນຶກໃຫ້ສັງຄົມຄວາມເຂົ້າໃຈຕໍ່ຄວາມຮ້າຍແຮງຂອງພະຍາດວໍ້ ແລະ ໃຫ້ມີສ່ວນຮ່ວມຫລາຍຂຶ້ນ.
ໂດຍສະເພາະແມ່ນຄວາມຮັບຜິດຊອບໃນການລ້ຽງໝາ-ແມວ ແລະ ສັດອື່ນໆຂອງຕົນ ໃນການຕ້ານພະຍາດດັ່ງກ່າວ, ວັນສຳຄັນດັ່ງກ່າວນີ້ຈະຈັດຂຶ້ນຢູ່ສວນເຈົ້າຟ້າງຸ່ມ ນະຄອນຫລວງວຽງຈັນ ເລີ່ມແຕ່ເວລາ 08:30-16:00 ໂມງຂອງວັນທີ 28 ກັນຍານີ້.
ຫົວໜ້າກົມລ້ຽງສັດ ແລະ ການປະມົງ ໃຫ້ຮູ້ວ່າ: ພະຍາດວໍ້ ເປັນພະຍາດທີ່ຮ້າຍແຮງສຳລັບຄົນ ແລະ ສັດ, ຖ້າຕິດເຊື້ອພະຍາດວໍ້ນີ້ແລ້ວແມ່ນບໍ່ສາມາດປິ່ນປົວໃຫ້ຫາຍດີໄດ້; ແຕ່ພວກເຮົາສາມາດປ້ອງກັນບໍ່ໃຫ້ສັດ ແລະ ຄົນ ເປັນພະຍາດວໍ້ໄດ້ດ້ວຍການສັກຢາກັນວໍ້, ດັ່ງຄຳເວົ້າທີ່ວ່າ “ສັກຢາກັນວໍ້ໃຫ້ໝາ-ແມວ ສາມາດປ້ອງກັນຊີວິດຂອງຄົນເຮົາໄວ້ໄດ້”.
ສິ່ງນີ້, ແມ່ນໄດ້ຮັບການຢືນຢັນມາຫລາຍກວ່າຮ້ອຍປີແລ້ວ ເຊິ່ງນັບແຕ່ໂລກເຮົາໄດ້ຄົ້ນພົບ ແລະ ຜະລິດຢາກັນວໍ້ຄັ້ງທຳອິດ ໂດຍທ່ານ ຫລຸຍ ປັດສະເຕີ ນັກປາດຝຣັ່ງ ໃນປີ 1885 ແລະ ນັບແຕ່ນັ້ນມາອັດຕາການລະບາດຂອງພະຍາດວໍ້ຢູ່ໃນໂລກມີຈຳນວນຫລຸດລົງເລື້ອຍໆ ເຮັດໃຫ້ມີຫລາຍປະເທດສາມາດກຳຈັດ ແລະ ປະກາດລົບລ້າງພະຍາດວໍ້ໃຫ້ໝົດໄປຢ່າງຊິ້ນເຊີງຈາກປະເທດຂອງຕົນ ເປັນຕົ້ນແມ່ນ: ສປ ຈີນ, ສ ເກົາຫລີ, ຍີ່ປຸ່ນ, ອົດສະຕຣາລີ, ນິວຊີແລນ ແລະ ຫລາຍປະເທດໃນເຂດເອີຣົບ ແລະ ອາເມລິກາ ອີກດ້ວຍ.
ດ່ວນ! ສັກຢາກັນພະຍາດວໍ້ສຳລັບສັດລ້ຽງໂດຍບໍ່ເສຍຄ່າ
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ Facebook Doodido.
