ຮ່ວມກັນກຳນົດແຜນການປັບປຸງແກ້ໄຂສຳລັບປະເທດດ້ອຍພັດທະນາ.

ຮ່ວມກັນກຳນົດແຜນການປັບປຸງແກ້ໄຂສຳລັບປະເທດດ້ອຍພັດທະນາ.

    ປະເທດລາວເຮົາຖືວ່າເປັນປະເທດໜຶ່ງທີ່ຍັງຢູ່ໃນເກນຂອງປະເທດທີ່ຍັງດ້ອຍພັດທະນາ ພັກ ແລະ ລັດຖະບານ ໄດ້ສຸມໃສ່ທຸກກ່ຳລັງເຫື່ອແຮງເພື່ອນຳພາປະຊາຊົນລາວໃຫ້ຫລຸດພົ້ນຈາກຄວາມດ້ອຍພັດທະນາ ແລະ ເພື່ອນຳພາປະເທດກ້າວສູ່ຄວາມສິວິໄລ ຮ່ວມກັບຫລາຍໆປະເທດ, ໃນແຕ່ລະປີກໍໄດ້ມີການປັບປຸງວາງແຜນໃນການພັດທະນາໄປເທືອລະກ້າວກັບຫລາຍໆປະເທດ.  ຕາມຂໍ້ມູນຂອງກະຊວງການຕ່າງປະເທດໃຫ້ຮູ້ວ່າ ໃນວັນທີ 17 ກັນຍາ 2020, ທີ່ ກະຊວງການຕ່າງປະເທດ ໄດ້ມີກອງປະຊຸມທາງໄກ ຂອງ ກຸ່ມປະເທດດ້ອຍພັດທະນາ ປະຈຳປີ 2020 (The Annual 2020 High-Level Meeting of the Ministers of Foreign Affairs of the Least Developed Countries), ໂດຍ ຮອງລັດຖະມົນຕີ ກະຊວງການຕ່າງປະເທດ ເຂົ້າຮ່ວມກອງປະຊຸມ, ມີປະເທດຕ່າງໆເຂົ້າຮ່ວມ 47 ປະເທດ.

    ກອງປະຊຸມດັ່ງກ່າວແມ່ນ ກອງປະຊຸມສະມັດຊາໃຫຍ່ ອົງການ ສປຊ ຊຶ່ງເປັນເວທີໃຫ້ແກ່ ບັນດາລັດຖະມົນຕີຕ່າງປະເທດ ຂອງ ກຸ່ມປະເທດດ້ອຍພັດທະນາ (LDCs) ລວມທັງຜູ້ຕາງໜ້າຈາກ ບັນດາປະເທດຄູ່ຮ່ວມພັດທະນາ. ອົງການເຄືອຂ່າຍ ສປຊ ແລະ ອົງການຈັດຕັ້ງສາກົນອື່ນໆທີ່ກ່ຽວຂ້ອງ ເພື່ອມາຮ່ວມກັນປຶກສາຫາລື ແລະ ແລກປ່ຽນຄຳຄິດຄຳເຫັນກ່ຽວກັບ ບັນຫາທີ່ພົ້ນເດັ່ນຕ່າງໆ ແລະ ຮ່ວມກັນກຳນົດແນວທາງ ໃນການຈັດຕັ້ງປະຕິບັດແຜນດຳເນີນງານ ອິສຕັນບູລ (Istanbul Programme of Action – IPoA) ສຳລັບປະເທດດ້ອຍພັດທະນາ ຂອງອົງການ ສປຊ.    ໃນໂອກາດດັ່ງກ່າວ, ທ່ານຮອງລັດຖະມົນຕີ ກໍ່ໄດ້ສະແດງໃຫ້ເຫັນເຖິງຄວາມຕັ້ງໜ້າຂອງ ສປປ ລາວ ໃນການຕັ້ງປະຕິບັດແຜນດຳເນີນງານ IPoA ລວມທັງຍົກໃຫ້ເຫັນບັນດາຜົນສຳເລັດ ແລະ ສິ່ງທ້າທາຍຕ່າງໆ ໃນໄລຍະຜ່ານມາ.
ພ້ອມກັນນັ້ນ, ທ່ານຍັງໄດ້ຍົກໃຫ້ເຫັນເຖິງ ຜົນກະທົບທີ່ມາຈາກການລະບາດຂອງ ພະຍາດໂຄວິດ-19 ໂດຍສະເພາະທີ່ຕິດພັນກັບຂົງເຂດເສດຖະກິດ-ສັງຄົມ ເປັນຕົ້ນແມ່ນ ດ້ານການທ່ອງທ່ຽວ, ການລົງທຶນ ແລະ ການຄ້າ ຊຶ່ງນຳໄປສູ່ການສູນເສຍລາຍຮັບຢ່າງຫຼວງຫຼາຍສຳລັບປະເທດ ລວມໄປເຖິງຜົນກະທົບໄລຍະຍາວຕໍ່ກັບຊີວິດການເປັນຢູ່ຂອງປະຊາຊົນໃນຫຼາຍມິຕິ.
ຮ່ວມກັນວາງແຜນແກ້ໄຂສຳລັບປະເທດດ້ອຍພັດທະນາ.

ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ Facebook Doodido.